Քեզ հորինեցի

 

Քեզ հորինեցի, որ իջնեմ ներքև,

Որ չապրեմ այդքան ամպերից վերև։

Քեզ հորինեցի` մենակ չանրջեմ,

Աստղերի ճամփան քո քայլով անցնեմ...

Դու հորինեցիր բազում առիթներ,

Որ թողնես ձեռքս` ամպերից ներքև...

Քո հորինածով ունեցա ոտքեր,

Որոնք առանց քեզ վարժվեցին քայլել...

Էլ չեմ հորինում ես ոչինչ արդեն,

Էլ չեմ ապրում ես ամպերից վերև։

Սովորեցի իմ հյուղակը սիրել,

Աստղերի ճամփան լոկ մտքով չափել...