Բառերը' լուսնոտ

Մի քիչ քամոտ են խոհերը այսօր,

Երկնքից կախված երազն է լուսնոտ,

Հանգերը սուտ են, երբ բառերը լոկ

Դասավորվել են տողերում հերթով...

Հերթով ամեն մեկն իր խոսքը կարդում

Ու հեռանում է ստվերի նման։

Եվ ոչ ոք չզգաց, թե ինչու վերում

Շիկնեց անուրջը, երբ լուսնին տեսավ...

Ու չխենթացավ ոչ ոք, երբ այսօր

Երկնքից կախվեց երազը լուսնոտ,

Բառերը հանգին լքեցին հերթով,

Քամին գողացավ ու տարավ իր մոտ...