ՔԵԶՆՈՎ

Դու չկաս հիմա, կշռում եմ  քեզնով

Խուլ ժամանակի բութ տնքոցները,

Տարածությունը իր պիրկ ձեռքերով

Փակել է սրտիս անուժ դռները...

Բայց դու եղել ես, լցվել են քեզնով

Իմ խենթ օրերի ծիածանները,

Հուշի երկնքում լողում է այսօր

Կարոտիս գույնի կապույտ մրուրը...

Դու դեռ կլինես, որ ներկեմ քեզնով

Սին պատրանքներիս դատարկ պատերը,

Թո՛ղ ժամանակը իր բութ տնքոցով

Խլացնի օրվա մաշող հետքերը...