Անձրևող պատմություն

Այսօր երազդ ես եմ, սիրելիս,

Քեզ այցի կգամ առվի կարկաչով,

Դու ինձ քո բազկի քնքշանքով գրկիր,

Ծածկիր մարդկանցից ամպեղեն քողով...

Այսօր անձրևդ ես եմ, սիրելիս,

Թույլ տուր զովացնեմ կոպերդ հոգնած,

Կարոտից պոկված ցողի մի կաթիլ

Թող որ վարարի շուրթերիդ ճաքած...

Այսօր ժպիտդ ես եմ, սիրելիս,

Ու պիտի բացվեմ հոգուդ ծալքերում,

Որ ով էլ այնտեղ ներխուժել փորձի,

Գտնի անձրևող մի հին պատմություն...