Հոգիս ճաք է տվել, փշուր-փշուր եղել,
Օտար գույներն եկել, ծվարել են այնտեղ...
Սիրտս կուչ է եկել, նվաղել է կարծես,
Աստղաթափ է շուրջս ու լռություն անտես...
Միտքս ծառս է ելել, թափառական դարձել,
Փշոտ ճամփա ընտրել, դեգերում է անվերջ...
Աչքս ջուր է կտրել, հեռուներին գամվել,
Խոնավ շիթերն են լոկ նրան ընկեր դարձել...
Ունկս մեկից լարվել, հնչյուններին կառչել
Ու տքնում է միայն հարազա~տը գտնել...
Ձեռքս կոտրվել է հրաժեշտի ճամփին,
Շա~տ է ճանապարհել օտար ու ծանոթին...
Ոտքս, միևնույնն է, դեռ քայլում է առաջ,
Հորիզոններ դեռ կան ծանոթ ու անճանաչ...
Դեռ գույները նորից պիտի վերածնվեն,
Հոգուս բեկորները կրկին իրար ձուլեն...
Որ ապստամբ սիրտս լռությունը փշրի,
Ձեռքս ուշացումով դիմավորի~...գրկի~...
Комментариев нет:
Отправить комментарий